DILI, 18 abríl 2024 (TATOLI)–Ekipa konjunta ne’ebé lidera husi Sekretaria Estadu Asuntu Toponímia Organizasaun Urbana (SEATOU), kinta ne’e, kontinua sobu uma no barraka ne’ebé okupa espasu públiku, hahú husi rate Bidau Santa-Ana to’o kurva fatuk bandeira.
Ekipa ne’e kompostu husi SEATOU, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Ministériu Obra Públika (MOP), Terra no Propriedade, Jestaun Merkadu Munisípiu Dili no entidade relevante seluk tan.
“Ohin ita mai kontinua hasai komunidade ne’ebé okupa espasu públiku no hela iha área protejida hamutuk uma-kain 40. Ita notifika sira desde loron 06 outubru 2023, antes ita notifika avizu uluk maibé sira la koopera, hakarak koko lei nia forsa, entaun ohin ita ho ekipa tun mai hasai sira,” Sekretáriu Estadu Asuntu Toponímia Organizasaun Urbana, Germano Santa Brites Dias, hateten, iha Bidau Santa-Ana.
Nune’e, governante ne’e nafatin husu ba komunidade hotu hodi koopera nafatin ho Governu, bainhira simu ona notifikasaun, karik balun la konkorda no hakarak lori ba Ministériu Públiku, IX Governu prontu hatan.
“Komunidade ne’ebé ita hasai antes ne’e ita fó tiha notifikasaun maibé sira lees tiha, dehan la hetan notifikasaun, entaun ohin ita mai lori kedas nia rezerva kopia hodi hatudu ba sira, atu sira kumpre, ita halo serbisu to’o hotu,” nia akresenta.
Sekretáriu Estadu dehan, komunidade afetadu ne’ebé ohin ekipa konjunta hasai, SEATOU sei la fó indemnizasaun maibé bainhira ministériu relevante sira karik prevee osan ba ida-ne’e bele fó, tanba atividade ne’e rasik bazeia ba lei.
“Ita hotu hatene, dekretu-lei númeru 33/2008 27 agostu, kona-ba ijiene no orden públiku ne’e, iha ne’ebá laiha artigu ida ka kapítulu, virsíklu no paragrafu ruma hateten ami sobu halo fali fatin ba sira, karik sira ezije ba ministériu relevante sira seluk, tanba ita hala’o serbisu la’o tuir de’it lei ne’ebé iha,” nia klarifika.
Governante ne’e haktuir, durante ekipa konjunta hala’o atividade, komunidade balun la kontente ho asaun ne’e no dehan katak rai ne’ebé sira hela hanesan rai privadu, tanba ne’e Sekretáriu Estadu husu bele konfirma ba Terra no Propriedade. Iha mós komunidade ne’ebé dehan luta ba rai ne’e bele trata iha Ministériu Asuntu Kombatente hodi bele hetan direitu ba luta.
Iha fatin hanesan, Abitante afetadu, Domingos Pereira, sente triste tanba ekipa tun hela fatin iha situasaun udan-laran.
“Ami-nia hela fatin iha Dili laiha, ha’u mai husi Laga Baucau no ha’u hela iha fatin ne’e desde tinan 1980, ha’u rasik mós kontribui ba luta rai ida-ne’e, maibé Estadu ne’e ita hotu nian, pasiénsia ha’u labele halo buat ida bainhira ekipa mai sobu ami-nia fatin tanba ita hotu presiza no hakarak dezenvolvimentu ne’e la’o iha nasaun ne’e,” nia tenik.
Ekipa konjunta ezekuta serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.
Jornalista : Arminda Fonseca
Editora : Julia Chatarina
Fontes Notísia: https://tatoli.tl/2024/04/18/ekipa-seatou-sobu-uma-no-barraka-40-iha-bidau-santa-ana/
