DILI, (timorpost.com)—Vendedór ikan iha tasi-ibun Bidaun Santa-Ana lamenta ho eviksaun forsada husi Sekretáriu Estadu Asuntu Toponomia Urbanizasaun (SEATU), ne’ebé obriga vendedór sira fa’an ikan iha merkadu Taibesi ne’ebé kondisaun ladi’ak.
“Ami husi grupu ai-leba ikan sente lasastifas ba aktu ne’ebé IX Governu Konstitusionál halo liuhosi Sekretáriu Estadu Asuntu Toponomia Urbanizasaun hamutuk ho autoridade munisípiu Dili halo eviksaun forsadamente ba ami vendedór ikan iha Bidau Santa-Ana hodi muda ami ba merkadu Taibesi, iha dia 8 Janéiru 2024”, Portavós Grupu Ai-Leba Ikan, Cesário Martins, informa ba jornalista iha Bidau Santa-Ana, Sesta,(19/01).
Portavós ne’e kestiona, “Ami kestiona espasu iha merkadu Taibesi, autoridade munisípiu Dili la kria kondisaun dígnu ba ami vendedór ikan”.
Cesário hatete, fatin fa’an ikan iha Bidau Santa-Ana prepara husi Governu Konstitusionál da-4 ho objetivu atu halibur no organiza vendedór abulante ikan sira iha dalan ninin ne’ebé okupa espasu estadu nian, tanba ne’e fatin refere própriu ba vendedór aira atu fa’an ikan, liuliu fasilita vendedór bele uza tasi-been rega ikan ne’ebé fa’an para labele att.
“Tinan barak ona ami utiliza fatin ida-ne’e, fatin ne’e apropiadu duni atu fa’an ikan, tanba bele uza tasi-ben rega ikan no fatin ne’e apropriadu duni kompradór sira atu asesu”,nia esplika.
Fatin Bidau Santa-Ana mós la besik ba komunidade atu simu bee fo’er husi fase ikan nian, nune’e mós vendedór sira kontinua hamoos no asegura ijene ba produtu ikan no areadór tomak.
Fatin Bidau mós fatin estratéjiku para vendedór sira hetan rendimentu di’ak hodi sustenta ba família, tanba ne’e bainhira polítika Governu nian atu bele muda sira ba merkadu Taibesi, mak sei fó impaktu ba rendimentu vendedór sira-nian, tanba fatin ne’e la asesível ba kompradór sira atu sosa fali iha fatin ne’ebá, ikan sai dodok no aat, sei aumenta problema ijene ladi’ak ba merkadu Taibesi.
Portavós ikan sujere ba Governu, liuliu Ministériu Agrikultura Pekuaria, Peska no Floresta, Ministériu Komérsiu Indústria ho Autoridade munisípiu Dili, atu halo rekonstrusaun ba merkadu ikan iha tasi-ibun, Bidau Santa-Ana.(*)
Fontes Notísia: https://timorpost.com/ekonomi/tp-46957/vendedor-ikan-bidau-santa-ana-lamenta-ho-eviksaun-forsada-husi-governu/
